Gunnfaxi frá Gafli í Svínadal, rauður og bæði arfhreinn slettuskjóttur og arfblendinn skjóttur, var keyptur til skemmtilegheita litarins vegna. Ætlunin er að sjá hvort hann verði þokkalegur reiðhestur. Ljóst þótti þó áður en kaup voru handsöluð að skap myndi reynast í folanum, þar eð hann bar sig þesslega. Gekk hann með stóðinu í hlíðum Svínadalsfjalls frá fæðingu snemma sumars og fram undir jól. Þá var hann tekinn undan og sendur suður á land ásamt hálfbróður sínum, hinum jarphjálmskótta Elíasi, og eru þeir nú í góðu yfirlæti í Sölvholti. Elías í þeim tilgangi að fjölga slettuskjóttum hrossum í Sölvholti, en Gunnfaxi einungis til að vaxa og þroskast fyrir geldingu og tamningu. Rétt aðeins var átt við að bandvenja hann, og tók hann því sæmilega, en þó ekki möglunarlaust, Elías var öllu námsfúsari.

Ættir Gunnfaxa eru eins og ættir systur hans Heppu sem einnig er í okkar eigu. Þekktar föðurmegin, en móðirin er af Tindakyni sem ekki verður ættrakið frekar.

Nafnið Gunnfaxi var valið með þessi skapeinkenni í huga, þar sem forliðurinn Gunn- merkir orrusta. Þannig að Gunnfaxi er annað hvort stríðandi hestur eða stríðshestur, allt eftir því hvernig tamning lánast.

Júní 2013